“Jadi, Min, pu mantong na rencana meudoa brok-brok keu lon?” Musa Ketik merasa kana dali bela droe. Ka ceubeuh.
Kolumnis : Nazar Shah Alam
Buno lam khutubah geukeun le khatib han geubi tanyoe meudoa brok-brok keu gob. Doa brok teuh akan meugisa bak droe, geukeun. Wo bak seumeujid lage haba itu, kamo meuduk bak Keude Makcek Nur. Meubahas keuh asoe khutubah Teungku buno.
“Teuma kan kadang tanyoe beungeh, Teungku, miseu gob ka jahat ngon tanyoe, hanjeut cit tameudoa nyang brok-brok? Daripada tabalah jahat!” jitanyong le Lako Saudah. Kali nyoe bagian surah na Teungku Him.
Geujaweub le Teungku Him, “teutap hanjeut. Keupu teuma ta meudoa nyang brok? Leubeh get ta meudoa beusadar jih, bek jahat le. Ukeu jeut tacok keu ngon lom kadang.”
“Tapi na ureung nyang ukuran jahat jih cit han me le tacok keu ngon, Teungku,” ijaweub le Mak Amin Labui.
Bagah isebeng le Lako Saudah, “lon kutuso so nyang ka maksud, Min.” teukhem jih.
Bek hana mangat, Mak Amin Labui ijaweub, “bek curiga nyang kon-kon, Lako Saudah. Kadang cit kon ureung nyan.” Jaro jih itop babah lage ijok syarat khusus bak Lako Saudah.
“Lon kutuso cit, Min. Bek bak lon meurahsia,” lon tebak padahai. Tapi Mak Amin Labui terpengaruh.
Musa Ketik ikeuneuk sambong, “lon ku…”
“Cit kah!” Meukeutam itakat le Lako Saudah. Meublak teukeupak kamo mandum. Teungku Him han ek teun kali nyoe, payah peuleuh su khem raya. Musa Ketik keuneuk balah, bagah geukoh le Teungku Him.
“Beh ka, tagisa lom bak bab hanjeut meudoa nyang brok buno. Intijih tameudoa nyang get-get supaya geupulang get le Po. Miseu gob jahat, tameudoa beumeu-ubah get teuma. O andai jih tetap brok akai, doa tanyoe buno meugisa bak tanyoe, geubi tanyoe gleh hate, mudah raseuki, seuliseh bala. Nyang jih lale keuh berkekalan lam brok, hate han tenang, udep han mangat.” surah Teungku Him ngon su bijak.
“Teuma lage miseu na piasan ta meudoa beu-ujeun, ek jeut Teungku?” lon tanyong. Semata-mata jeut saheh sagai.
“Meunyoe piasan nyan seubago pengundang mudharat, jeut-jeut mantong. Namun alangkah leubeh bijak manakala tapulang urusan meunalah bak Allah mantong. Cara bah urusan Allah, bek ta-veto le geutanyoe hamba. Tanyoe jeut tameudoa, ya Allah bek neupeubiyeu maksit, neujaga bumo Aceh nyoe dari sigala nyang brok meunurot Droneuh ya Allah. Bah Allah cok urusan kemudian. Lom pih hana tatu’oh that geutanyoe bab beutoi meunurot Allah atau sebaliknya. Nyang jeut ta meuagak-agak sagai,” surah Teungku Him. Kamo meuanggok mandum.
“Nyang gura na ureung geumeudoa lake-lake beugeupeutron bala le Allah. Padahai wate takalon ureung meudoa, meu-aurat mantong hana abeh geutob.” keun Mak Amin Labui.
“Nyangkeuh, nyan saboh cit. Leuh droe nyang meudoa beugeujok bala, droe nyang lake beutroh ujeun raya, wate geujok bala ie raya le Allah keunong droe ka peuseubab gob. Padahai doa droe terkabul. Nyangkeuh meunan awak tanyoe. Nyang droe hana salah. Droe hana seumayang, meujudi, meumaksit hana deuh aju. Bandum-bandum gob po sebab.” Meukheuk teukhem Teungku Him. Kamo ka meuho.
“Jadi, Min, pu mantong na rencana meudoa brok-brok keu lon?” Musa Ketik merasa kana dali bela droe. Ka ceubeuh.
Mak Amin Labui itanyong meunan langsong ikalon ateuh Lako Saudah. Meusigo ijaweub dua jih, “meunyoe keu kah Musa Ketik, haleu tahina, haleu tafitnah, haleu tapeusaket, haleu taghibah. So peusaket hate gata, asoe syiruga.”
Peunoh su khem bak keude Makcek Nur. Musa Ketik hana pat dawa. [NSA]
