Droe Bangai, Juri Salah

Bagikan:

Kolumnis : Nazar Shah Alam

Dalam sejarah sipanyang Gampong Kuta Barka nyoe teudong, tercatat bahwa na sidroe makhluk nyang hantom pernah geutem salah dan hantom pernah keubit-bit talo lam udep geuh, yakni sidroe agam nyang bernama asli Tu Basa bin M. Gari. Meskipun nan jih lagak sedemikian rupa, namun ureung gampong ban sigom Kuta Barka geuhoi beliau ngon panggilan “Ampon Juri Salah”.

Adapun permulaan langgam nyan timoh, meunurot riwayat dari Almukarram Kuta Barka, yakni Teungku Him, dimulai dari saboh wate yoh masa ubeut beliau ikot lomba azan di gampong. Sidroe peserta jiek podium, meutuka sidroe, meuganto sinan, troh lah bak jatah Tu Basa unjuk kebolehan. Hana re, leuh Salamulekom meunan-meunan aju, geutarek ju “Allahu Akbar Allaaaaahu Akbar.”

Bak phon mantong timang. Troh bak “Hayya’all falah” inan keuh imulai meubalot kaset. Leuh geutarek dua go “hayya’alalfalah” geudaboh aju “qadqamatish shalah”. Dua go puduk. Timang. Hana beban, hana merasa bersalah. Gob surak geuanggap penghargaan. Leuh azan meuteume tarek panton lom, “buah rambut masak setangkai, diletak-letakin di atas batu, saya ini belumlah pandai, masih duduk di kelas satu.” Padahai sikula gobnyan ka glah 6 SD. Beut ka bak Quran.

Meubura gob pok-pok jaro. Tu Basa ngon ruman yakin geutron podium. Duk lam kawan na itimoh mbong siangen lom. Kon ka? Teukalah malam pengumuman. Geupreh juara 3 hana jihoi nan beliau, juara dua pih hana. Juara 1? Hana cit. Geujak bak juri geutanyong sebab. Po juri geukeun, “drokeuh azan ka pah, irama meu-katuk ayon meunan, cuma bak ujong ka neujak iqamat. Inan keuh iduk salah.”

Singoh nyan bak sikula rap bak rata ureung geujak peugah bahwa gobnyan talo kon seubab salah. Tok seubab juri ka ibayeu le keluarga awak meunang. Rata sago nyan geupeugah. Teuma seubab mantong aneuk mit, parte juri hana geucok keu peukara. Enjoy aja. Inan keuh mulayi na bisik-bisik langgam “Ampon Juri Salah ” keu Tu Basa.

Padum buleun selanjut jih ikot teuma lomba peragaan busana muslim di kecamatan. Ngon baje beuludu mirah, kupiah ijo, ridak kuneng, luweu ijo laot geutujeut jak bak catwalk. Talo. Woe inan geukeun, juri ka ibayeu le awak gampong laen. “Kuta Barka meuharap meunang murni, han akan terjadi tapuwo piala meunyoe lage nyan.” Geukeun le Tu Basa, meutamah konga aju meukumat nan Ampon Juri Salah bak gobnyan. Pulom fakta jih thon ukeu nyan, keun Teungku Him, peserta geutuka ngon Nurudin Ora Penak (aneuk Jawa Meuranto), get imeungui, tanpa bayeu juri, jeut jih keu juara.

Laen wate na meutunang bhan 17 Agustus, talo Kuta Barka ngon Desa Paya Silak-Lak. Jidong lam kawan peu ikeun? “Wajar tanyoe talo, wasit ka ibayeu le awak nyan. Beulaku awak Paya Silak-Lak rame kaya, ek jibloe wasit awak nyan.” Nyaaaaan, inan hana pat lie le langgam Ampon Juri Salah keu peuganto nan asli geuh.

Apakah jino ka meuubah beliau seiring ok ka rap abeh puteh ateuh ule? Nehi. Nehi karongge. Sidumpat mantong na lomba, asai awak Kuta Barka talo, pendapat gobnyan tetap sama, yaitu “padahai tanyoe jatah meunang, tapi juri ka ibayeu le lawan, hana pah juri, salah juri”.

Buleun likot na lomba surah kitab di Bandaceh, si Bonsu aneuk Bang Yatim meuteume posisi harapan 3. Pah meurumpok bak Keude Makcek Nur geukeun, “nyan seubab bak bideung agama, juri han itujeut macam-macam ngon ayat Tuhan. Makajih tanyoe meunang. Meunang murni.”

Geujaweub le Teungku Him, “jih nyang ikeun juara teutap 1, 2, 3, Ampon Juri Salah hai. Nyoe ka harapan pane na lom juara.”

Bagah geujaweub le Ampon Juri Salah, “haik, haarapan lago. Rupajih ka troh-troh bak bideung agama juri hana beutoi le, Teungku. Han mungken si Bonsu meuteume harapan, apalagi talo muteulak. Ino jih lancar that ibeut kitab. Mustahe ideh jih gagal. Nyan pasti juri ka ibeyeu le awak lawan. Han mungken han”.

Baca Juga:  Kebakaran Jelang Subuh, Mobil dan Sepeda Motor Risman Musnah Terbakar

Tinggalkan Balasan

Alamat email Anda tidak akan dipublikasikan. Ruas yang wajib ditandai *

No More Posts Available.

No more pages to load.