Tipe-Tipe Awak Proteh But Gob

Bagikan:

Kolumnis : Nazar Shah Alam

Tam kupuduk hp bak aleu, kukalon Mak Amin Labui ladat that ikalon ujeun.

“Hana aktif sagai gata bak Facebook dan medsos laen lawet nyoe, Min. Pu hana paket? Biasa asai ka ujeun ka katuleh puisi,” lon tanyong. Kamo teungoh meulipe bak ujeun bak jambo blang Utoh Usen.

“Hana, bang Za. Beu-o lon. Nyang na suntok inan. Nyang jai tabaca cit proteh. Dumpu peukara salah bak mata jamaah Medsosiyah. Mapaki?” ijaweub tanpa ikalon ateuh lon.

“Nyan cit ka peukateun awak tanyoe, Min. Han suah hireun. But gob dumpu salah, nyang beuna cit but droe. Cuma na peukara laen nyang leubeh brat. Nyang jeut tok meukuk-kuk likot pageu, wate ka lam geulanggang ka lage-lage tuwo ingat. Hanjeut ju ipubut sapu. Atawa wate ipulang but bak jih, hana meusu le, hase but lage haba itu cit” ijaweub le Lako Saudah sira jilut boh ceumeucot bak iluweu jih.

“Tapi na cit nyang beutoi proteh nyan, Lako Saudah. Na nyang membangun. Proteh nyang na asoe,” lon seuot.

“Na-lah, bang Za. Na 3 boh tipe ureung proteh. Nyang phon, ureung carong dan bijaksana. Gobnyan geuproteh demi kebaikan dan perbaikan ukeu, demi kemaslahatan bersama. Bak ureung nyan hana kepentingan laen seulaen perbaikan dan kebaikan. Nyang keudua, ureung sampik hate dan loba. Nyan geuproteh sebab beliau hana meuteume tumpok bak agenda nyang teungoh teulaksana. Nyang keulhe, golongan iku uleu. Nyan parte geupantau berita bak haba keu haba, geuteupu sapu tan, tapi geuproteh cit karena rame ureung proteh, tujuan sipu sagai: demi dianggap le ureung bahwa gobnyan kritis. Nyan, tanyoe pat iduk?” bijak Lako Saudah jaweub.

“Ci gata bagi ju, Lako Saudah. 3 droe tanyoe, pah 3 boh tipe. Bagi beupah,” lon keun sira lon reugam boh seuninju.

“Bang Za golongan phon. Hanjeut gese,” ijaweub bagah le Lako Saudah. Jisambong, “lon golongan keu 3. Mak Amin Labui nyata-nyata golongan keudua.”

Teukeujot Mak Amin ikalon teubli mata ateuh Lako Saudah.

Lako Saudah cuet (baca:cuwet) mantong. Isambong, “na tingat wate relip tameh meuseujid puasa likot? Keupu ka proteh Utoh Usen? Kajak keun but gobnyan hana rapi bak Geuchik Musa. Padahai seubab gata hana ipeuroh keurja. Untong geuchik hana terpengaruh. Nyoe ikap haba kah, putoh raseuki Utoh Usen.”

“Kah cit galak that haba meu-ungket. But-but silap jameun kapeutimoh lom,” iseuot ngon su meudhot le Mak Amin Labui.

“Nyan kon ungket, Min. Cuma mengingatkan kembali. Jeut jeulah bak golongan toh tanyoe,” lon koh.

“Sabe. Sabe dua lawan sa. Ci sidroe lawan sidroe, na tujeut?” ka kreuh su Mak Amin. Mata jih hana ikalon ateuh kamo.

“Jak, Min. Jak teuk bak pusu. Jeut takalon dum toh hayeu gata,” lon jaweub ngon geurtak.

Mak Amin hana ibeudoh. Ie mata jih sagai meulindong. FYI, wate meuruno silek jameun Mak Amin jareung ijak bak geulanggang. Efek beu-o meuruno, talo lam kawan. [NSA]

Baca Juga:  LEUBEH BAK ULAMA

Tinggalkan Balasan

Alamat email Anda tidak akan dipublikasikan. Ruas yang wajib ditandai *

No More Posts Available.

No more pages to load.